Mga opisyal sa Lagtang, Talisay giawhag pagsulbad sa abog

CEBU, Philippines - Ang mga opisyal sa Barangay Lagtang, Talisay giawhag sa usa ka opisyal sa dakbayan nga pangitaan nila og sulbad ang problema sa abog sa ilang dapit nga nakaapekto sa mga molupyo ug motorista.

Si Konsehal Antonio Bacaltos, Jr., tsirman sa committee on environment sa dakbayan sa Talisay, miingon nga ang mga opisyal sa barangay dili angay nga magkyogpos lang sa problema.

Usa sa mga nagpuyo sa bukirang barangay mibutyag nga ang mga nagpuyo sa Lagtang, ilabi na sa Sitio Tangub, magpunay lang og hanggap sa abog sa karsada.

Nabantayan nga ang mga dump truck nga magkarga og anapog magpahaguros lang pagpadagan ug manglupad ang mga abog ug dilikado kaayo sa mga motorista ilabi na sa mga motorsiklo nga madisgrasya.

Ang lagda sa Republic Act 4136 kon Transportation and Traffic Code nga ang mga susama nga karga kinahanglan g’yud nga tabonan aron dili madakpan ang drayber.

Matud ni Bacaltos nga gisusi niya ang maong problema ug iyang nasuta nga ang mga dump truck nga magkarga og anapog gikan kini diha sa Aznar quarry sa Sitio Tangub.

Si Bacaltos miingon nga bungdo kaayo ang ikarga nga anapog sa dump truck mao nga magtagak-tagak kini sa karsada nga maoy hinungdan sa abog.

Giawhag ni Bacaltos ang kapitan sa Barangay Lagtang nga mohimo dayon og aksyon sa maong problema.

Mibahad si Bacaltos nga kun dili mogama og aksiyon niini ang barangay apil ang nagdumala sa quary nga dili pun-on ang karga sa trak moadto siya sa Provincial Environment and Natural Resources Office (PENRO).

Ang karsada  gikan sa Barangay Lagtang paingon sa kabukiran lahus na sa dakbayan sa Toledo gipalapdan ang karsada sa Department of Public Works and Highways (DPWH).   (BANAT NEWS)