Mitulis sa La Nueva, local boys – CIB

CEBU, Philippines - Nagtuo ang hepe sa City Intelligence Branch sa Cebu City Police Office Chief  Inspector Romeo Santander nga local boys lang ang mitira sa La Nueva sa Inayawan sa miaging hapon. Matud ni Santander nga ila pa karon nga gi-validate ang identity sa duha sanglit nakuhaan man ang ilang mga nawong sa CCTV camera sa maong tindahan.

Ang usa sa duha ka suspetsado nga gihulagway nga usa ka kimpang mitan-aw pa sa camera ug naklaro ang iyang nawong.

Samtang ang batan-on niini nga kauban wala kaayo maklaro ang nawong tungod kay nagkalo man kini unya nagsul-ob og sunglasses. Nagpahigayon na og profiling ang CIB sa mga responsable sa maong pagpanulis ug naglaom si Santander nga maila na nila sa daling panahon.

Nakig-alayon na sab sa kapolisan sa dakbayan sa Talisay sanglit ang mga saksi mitug-an kanila nga ang mga tulisan didto mopadulong sa dakbayan sa Talisay human sa maong hitabo. Si Chief Inspector Alexis Relado sa Pardo Police miingon nga iyang nabantayan nga duha lang ka bala ang dala sa gwardya sa maong tindahan ug wala pa gyud kini gibutang sa tambor sa iyang revolver.

Matud pa ni Relado nga magpatawag siya og tigom sa mga security provider aron malikayan ang susama nga insidente.

Si Santander sa iyang bahin miingon nga kinahanglang korihian kini sa mga security agencies. (BANAT NEWS)