CEBU, Philippines - Mga piniriso sa Talisay City Jail sa barangay Maghaway dili na unya mangayo pa og kwarta sa mga moduaw kanila tungod kay duna na silay panginabuhian diha sulod sa prisohan sama sa pagpamuhat og mga basket.
Si Chief Inspector Felipe Montejo, jail warden sa TCJ mibutyag nga ubay-ubay sa mga piniriso ang nanghimo og mga basket nga pang-export.
Ang maong livelihood program gipasiugdahan kini sa kadagkuan sa Bureau of Jail Management and Penology (BJMP).
Gibutyag ni Montejo nga usa ka export company sa dakbayan sa Mandaue ang mi-supply kanila og mga gamit alang sa basket weaving.
Kahinumduman nga ang mga piniriso diha sa TCJ gitudloan usab pagpamuhat og mga kandila kaniadto ug nagpahigayon usab sila og vermiculture o pagpanghimo og abuno gamit ang nadunot nga basurang malata.
Dugang ni Montejo nga hinuon dili tanang mga piniriso ang miapil sa basket weaving tungod kay uban kanila ang pamilya dunay ikasarang o arangan. (/EIM)(BANAT NEWS)