Wanted nadakpan tungod sa Facebook

CEBU, Philippines - Wanted sa kasong abduction ug rape nadakpan human ma-post  iyang picture sa  Facebook kauban iyang mga kabanay nga natultolan sa kapolisan tungod sa background sa picture.

Ang mga sakop sa Presinto 6 sa Mandaue City Police Office (MCPO) miadto sa dakbayan sa Bogo niadtong miaging Martes sa hapon aron pangitaon ang suspek nga si Nino Sentillas Cueva, 20, usa ka drayber sa habal-habal nga taga Barangay Casili, dakbayan sa Mandaue. Si Cueva maoy suspek sa pagdagit ug paglugos sa usa ka 17- anyos nga tinun-an sa high school niadtong Mayo sa tuig 2012 matud pang Senior Inspector Romel Luga, hepe sa kapolisan sa Presinto 6 sa MCPO.

Ang suspek duna nay warrant of arrest nga giisyu gikan ni Judge Rafael Yrastorza Sr. sa Branch 28, Regional Trial Court (RTC) 7, walay girekomendar nga piyansa alang sa temporaryo nga kagawasan niini. Ang biktima gikan pa sa eskuylahan ug misakay sa habal-habal sa suspek padung pauli apan gidala siya niini sa kalibonan ug didto gilugos. Misibat ang suspetsado human mapasakai og kaso. Matud pa ni Luga nga human mogawas ang warrant ilaha nang gi-monitor ang mga Facebook accounts sa mga kabanay sa suspek hangtud nga dunay usa ka hulagway didto nga kauban ang suspek ug gikuha kini sa Bogo City.

Pinaagi sa tabang sa kapolisan sa maong siyudad natultulan nila ang lugar diin nakuha ang picture hangtud nga ilang naabtan ang suspek sud sa usa ka internet café samtang kini naka-online.  (BANAT NEWS)