Namuso nadakpan sa mga tanod

CEBU, Philippines -  Usa ka lalaki gidakop sa mga tanod kay gireklamo sa 17-anyos nga dalagita nga nangayo og tabang kaniadtong Martes sa tungang gabii kay giabusohan siya didto sa dalan Palma, Barangay San Roque, dakbayan sa Sugbo.

Ang suspetsado mao si Lito Manco, 38, molupyo sa nahisgutang lugar gidakop nila ni tanod Arnold Banguil, Renerio Guibone ug Junrey Balascas nga mitugyan sa dinakpan sa Waterfront Police Station.

Kagahapon sa hapon ang suspetsado gipasakaan og kaso’ng “unjust vexation”.

Sa imbestigasyon sa kapolisan nahibaw-an nga ang dalagita nag-ilis sulod sa iyang kwarto ug nakabantay sa usa ka lalaki’ng mibuso kaniya diha sa bentana hinungdan nga misinggit siya’g tabang.

Naatol nga niadtong higayona nahiagi ang mga tanod nga nag-roving mao nga nasikop dayon ang suspetsado. (BANAT NEWS)