Bacaltos ug Cañete out, Ramos in

CEBU, Philippines - Si Mayor Johnny De los Reyes sa dakbayan sa Talisay mipadayag sa iyang pag-uyon nga ang kanhi presidente sa Talisay City College (TCC) nga si Tomas Ramos ibalik nga presidente sa nahisgutang tunghaan.

Matud pa sa mayor gusto niya nga ang kamatuoran ang magpatigbabaw ug si Ramos nabiktima lang sa kinalit-kalit nga desisyon sa pagpahawa kaniya isip presidente sa TCC kaniadto.

Ang mayor nagkanayon nga nagpasalamat siya nga dihang gipapahawa si Ramos sa TCC wala kini nagmagahi apan mipasaka kini og reklamo ngadto sa Civil Service Commission.

Niining ulahi lang ang CSC mipa-reinstate kang Ramos tungod kay giingong ilegal ang pagpapahawa kaniya sa Board of Trustees (BOT) diin ang naulahi wala hatagi og due process of law.

Kahinumduman si Ramos giingong wala kini maka-liquidate sa P10 milyones nga pundo sa tunghaan hinungdan nga gi-terminate kini sa iyang posisyon.

Matud sa mayor nga andam siya sa pagdawat og balik kang Ramos nga molingkod isip presidente sa TCC.

Ang mayor nagtuo nga mosabot niini si Paulus Mariae Cañete apan kinahanglan usab mopahawa sa TCC si Bacaltos una pa si Cañete.

Kahinumduman nga si Cañete gitudlo kini sa mayor pinaagi sa executive order nga maoy molingkod nga presidente sa TCC.

Si Cañete sa iyang bahin, nagkanayon nga mosubay siya sa desisyon sa CSC tungod kay balido man kini ug wala usab siya manag-iya sa TCC.

“I will abide sa decision sa Civil Service, I don’t own the TCC, I am not like Richel Bacaltos, mandate man na sa Civil Service,” ni Cañete pa kinsa miingon nga angay gyud nga i-implimentar ang maong kamandoan.

Si Bacaltos nga nahinabi sa Banat News kagahapon nagkanayon nga silang tanan sa TCC mga contractual lamang.

Si Ramos gitaktak sa BOT tunga-tunga na sa buwan sa Hunyo niadtong tuig 2013. Dugang ni Bacaltos nga mag-agad pa usab sa BOT ang desisyon kung i-reappoint si Ramos isip presidente sa TCC. Si Bacaltos mikwestiyon kung nganong karon lang kini migawas nga niadto pa man kining Nobiyembre giluwatan ang desisyon sa dihang wa pa magkagubot ang TCC.       

Sa laing bahin, si Konsehal Richard Francis Aznar, tsirman sa committee on education subling mohangyo ni De Los Reyes nga ihatag na ang sweldo sa mga magtutudlo ug non-teaching staff.

Apan ang mayor miingon nga si Bacaltos maoy nag-hire kanila ug base sa kontrata kutob lang sila niadtong Septiyembre sa milabay’ng tuig apan tungod sa ilang hangyo gipapirma niya sila og laing kontrata kutob niadtong bulan sa Disyembre.

Gikan niadto wa na sila mobalik ug nipadayon sa ilang trabaho ug nangayo na kini og sweldo bisan og wala nay kontrata.

Gipasabot sa mayor nga wala niya balibari ang maong mga kawani ug gani gipaadto niya sila sa iyang buhatan aron sweldohan sulod sa duha ka buwan niadtong Pebrero.

Apan ang maong mga kawani giingong wala mosugot kay papirmahon sila og kontrata nga kutob na lang sila niadtong buwana.

Ang mga kawani nagkanayon nga ang Board of Trustees (BOT) maoy nagtudlo kanila ug ang BOT mao usab ang dunay katungod nga mopapahawa kanila sa pwesto. (BANAT NEWS)