CEBU, Philippines - Pabiling misteryo ang kamatayon sa usa ka lalaki nga gikatahong may kapuyo nga babaye ug bayot nga gipusil sa wa pa mailhing tawo sa miaging tungang gabii sa dalan Panganiban sa dakbayan sa Sugbo. Ang biktima naila nga si Daniel Mahinay, 21, molupyo sa Carbon Market sa barangay Ermita apan lumad nga taga Malaybalay, Bukidnon.
Ang kapolisan sa Homicide Section sa Cebu City Police Office miingon nga ang biktima naghigda na sa dalan duol sa balay sa iyang higala nga si Jericho Rusia apan wa nay kinabuhi. Matud pa sa mga saksi nga may duha ka buto sila nga nadunggan sa wala pa makit-i si Mahinay nga nagbuy-od na sa dalan ug dunay nadungog nga tingog sa motor palayo sa lugar. Ang biktima naigo sa iyang likod ug sa luyo nga bahin sa ulo hinungdan sa iyang kamatayon. Si SPO4 Alex Dacua nga nahinabi sa The Freeman/Banat News miingon nga ila pang gitan-aw ang motibo sa maong pagpamusil sanglit wala may nakakita sa maong hitabo. Usa sa mga gisusi sa kapolisan ang taho nga may kapuyo ang biktima sa Carbon Market ug may anak na sila ug ang giingon usab nga may gikapuyo kini nga bayot ug sagad silang makit-an nga mangaon sa may Pahina-San Nicholas. (BANAT NEWS)