Nasunogan sa Umapad, Mandaue gihatagan na og tabang salapi

CEBU, Philippines -  Ang 64 ka pamilya nga nabiktima sa sunog didto sa Purok Limonsito, Barangay Umapad, Dakbayan sa Mandaue kaniadtong miaging tuig gipanghatagan na og hinabang-salapi sa kagamhanan sa Mandaue.

Ang City Treasurer’s Office (CTO) ug City Social Welfare Office nga gipangulohan ni Violita Cabada maoy mitunol sa cash assistance ngadto sa mga biktima nga gisaksihan ni Umapad Barangay Kapitan Nelson Rubio.

Si Kapitan Rubio miingon nga ilang natala ang 53 ka tag-iya og panimalay nga mga biktima sa sunog ug 12 usab ang mga nag-abang og panimalay sa maong dapit.

Matud pa ni Kapitan Rubio nga ang 53 nga house owner nakadawat og ta’g P10,000 ug P5,000 usab ang nadawat sa mga nag-abang lang og panimalay.

Dugang ni Kapitan Rubio nga nakadawat na og hinabang ang nahisgutan nga mga biktima gikan sa kwarta sa barangay nga gihatag kanila pipila ka adlaw human sa sunog.

Gitataw ni Rubio nga human g’yud mahitabo ang sunog sa miaging tuig gideklarar dayon sa konseho sa barangay ang Sitio Limonsito nga ubos sa state of calamity.

Si Konsehal Diosdado Suico, chairman sa committee on finance sa konseho sa Mandaue, miingon nga dugay na nilang giaprobahan ang paggahin og salapi sa kagamhanan alang sa biktima sa barangay Umapad.

Matud ni Suico nga ang gahin kuhaon gikan sa Calamity Fund sa dakbayan apan nalangan lang ang pag-apod-apod sa salapi ngadto sa mga biktima sa sunog.  (BANAT NEWS)