Abog sa dalan gireklamo sa mountain barangays

CEBU, Philippines - Nahilom na pipila ka  buwan ang isyu kabahin sa pagpalapad sa karsada diha sa bukirang barangay sa Talisay gikan sa Lagtang paingon na ngadto sa dakbayan sa Toledo.

Apan niining ulahi lang usa sa mga residente sa usa sa bukirang barangay sa Talisay kinsa nagdumili sa pagpahingan mibutyag  nga ang mga residente diha sa Lagtang ilabi na dapit sa Sitio Tangub nag-antos paghingos sa abog ilabi na karong ting-init.

Kahinumduman nga ang karsada diha sa maong lugar gipalapdan apan wala maaspalto. Panahon nga ting-uwan permamente silang kulbaan tungod sa kahadlok sa pagdahili sa yuta, gani duna nay nakalas sa maong dapit human naligiran og bato. Si Talisay City Councilor Antonio Bacaltos Jr., chairman sa committee on environment sa pakighinabi sa Banat News nagkanayon nga susihon niya karong adlawa (Lunes) ang gireklamong lugar. (BANAT NEWS)