CEBU, Philippines - Lima ka tawo ang nasikop sa managlahing anti-illegal drugs operations sa kapolisan sa miaging adlaw.
Nasikop sa kapolisan sa lungsod sa Bantayan ang usa ka gipasanginlang pusher sa buy-bust operation alas 11:00 sa miaging gabii sa Barangay Kabac .
Ang nasikop naila nga si Francisco Gilbuela, 37, molupyo sa nahisgotan nga lugar. Dihang gidawat sa suspek ang P300 nga marked money bugti sa usa ka pakete nga shabu gisikop kini dayon.
Narekober sa kapolisan gikan sa suspek ang buy-bust money nga iyang gidawat. Ang suspek kasamtangang natanggong karon sa Bantayan Police Station samtang giandam pa ang kaso batok kaniya.
Nasikop usab si Dante Cuico, 38, molupyo sa Barangay Kasambagan sa dakbayan sa Sugbo.
Narekober sa kapolisan ang usa ka disposable syringe ug duha ka ampule nga nubain nga duna pay sulod atol sa usa ka saturation drive nga gipangulohan ni Insp. Leoncio Baliguat.
Samtang nasikop sab si Clark Kim Vergel, 37, molupyo sa Matin-aw, Maasin City, Southern Leyte. Base sa imbestigasyon sa kapolisan nga nag-escort unta si PO2 Antonio Bustamante sa usa ka VECO personnel sa dalan Legaspi sa barangay Sto. Niño aron sa pagbasa sa metro sa kuryente.
Apan nakit-an sa maong polis si Vergel nga may gilabay sa kilid niini ug nasuta nga ang gilabay ni Vergel tulo ka pakete nga shabu. Busa iya dayong gigukod ang suspek ug gidakop kini ug daling giturn-over sa Waterfront Police Station.
Wa usab makaipsot si Alexander Ebales, 24, taga Barangay Basak-Pardo sa dakbayan sa Sugbo. Base sa imbestigasyon sa kapolisan nga ang suspek nasakpan sa akto nga nagsuyop sulod sa usa ka payag sa nahisgutan nga barangay.
Narekober sa kapolisan ang duha ka aluminum tin foil nga gihimong funnel ug improvised tooter, duha ka linikit nga tissue paper, ug usa ka disposable lighter.
Daling gidala sa Pardo Police Station ang suspetsado aron mapasakaan og kaso.
Sa ikaduhang higayon, subling nadakpan ang usa ka gikatahapang pusher og shabu sa buy-bust operation nga gihimo sa kapolisan sa sitio Landing, barangay Catarman, Liloan niadtong Sabado sa gabii.
Ang nadakpan mao si Edmund Autencio, 53, nagpuyo sa maong dapit kinsa nakuhaan og usa ka paketeng shabu ug ang marked money nga gipalit sa maong drugas kaniya.
Si PO3 Jesson Gayo sa kapolisan sa maong lungsod miingon nga nadakpan na nila si Autencio sa mao gihapong kalapasan sa miaging tuig ug napasakaan na nila og kaso apan nakagawas kini human makabutang og piyansa sa korte. (BANAT NEWS)