CEBU, Philippines - Ang Cebu City Traffic Operations Management miawhag sa kagamhanan sa dakbayan sa Sugbo nga palapdan ang dalan Tres de Abril samtang ang Department of Public Works and Highways giawhag ‘sab pagpalapad sa Gov. Mariano Cuenco Avenue.
Ang mga sakop sa CITOM Board nga gipangulohan ni Ruben Almendras nagtan-aw nga tungod sa kadaghang sakyanan nga moagi sa dalan Tres de Abril kanunay kini nga makasinati og grabe nga problema sa trapiko.
Ang kabahin sa Tres de Abril nga gisugyot sa CITOM nga palapdan mao ang gikan sa eskena A. Lopez paingon na sa dalan F. Llamas sa Barangay Punta Princesa.
Nabantayan usab nga samtang gamay ra kaayo ang karsada adunay mga tindahan nga gitukod sa aseras nga nakapasamot sa problema kay ang mga tawo anha na man maglakaw sa karsada.
Giawhag sa CITOM ang administrasyon ni Mayor Michael Rama nga unahon ang paggahin og salapi alang niini nga proyekto aron pagsulbad sa problema.
Sa susamang resolusyon, ang CITOM miawhag usab sa DPWH pinaagi ni Regional Director Ador Canlas nga hatagan og una nga pagtagad ang pagpangayo og budget alang sa pagpalapad sa Governor Mariano Cuenco Avenue.
Gipasabot sa CITOM nga ang Gov. Cuenco Avenue maoy “main road†nga agian sa mga molupyo sa amihanang kabarangayan sama sa Talamban, San Jose, Pit-os, Binaliw, Pulangbato ug uban pa.
Ang CITOM miingon nga tungod sa nagkadaghan na nga mga sakyanan kanunay nga makasinati og problema sa trapiko ang mao nga mga karsada bisan dili “peak hours.†(BANAT NEWS)