CEBU, Philippines - Ang mga nagpuyo sa ibabaw nga bahin sa Barangay Kalunasan, dakbayan sa Sugbo mireklamo karon tungod kay dili na sila paagion sa karsada nga anaa molagbas sa Beverly Hills kun lapas na sa alas diyes sa gabii. Ang mga hingtungdang lumulopyo sa Upper Kalunasan namirma og suwat-reklamo ug gipadangat nila sa Cebu City Council pinaagi ni Konsehal Eugenio Gabuya Jr. ug ni Atty. Rafael Christopher Yap sa CITOM.
Matud sa mga nangreklamo nga kaniadto gitugotan ra sila sa mga opisyal sa Beverly Hills Homeowners Association nga makaagi diha sa karsada nga naglagbas sa subdivision apan karong bag-o aduna’y gipatuman nga kausaban.
Kadtong dili lumulopyo sa Beverly Hills ug walay pagtugot sa mga hingtungdan nga homeowners dili katugotan nga makasulod sa Beverly Hills kun lapas na sa alas 10 sa gabii.
Nakasabot ang mga mireklamo nga ang bag-ong paagi gitumong kini tungod kay aron paglikay nga adunay mga dautang elemento nga makasulod sa ilang subdivision.
Ang mga lumolupyo miingon nga nasayod sila nga ang karsada nga naglagbas sa Beverly Hills, ilabi na ang gikan sa main entrance sa Sitio Sudlon, Lahug ug ang pikas ganghaan sa Sitio Oprra, Kalunasan gidonar na ngadto sa dakbayan sa Sugbo.
Ang mga konsehal sa dakbayan nagkauyon nga ang mao nga isyu ila’ng ipasusi sa City Planning and Development Office kun tinuod ba nga gidonar ang mao nga karsada ngadto sa dakbayan.
Ang kopya sa reklamo sa mao nga mga molupyo ipadala usab sa konseho ngadto sa mga opisyal sa homeowners association. (BANAT NEWS)