CEBU, Philippines - Si Konsehal Antonio Bacaltos dili mag-public apology sa iyang pagbutyag kabahin sa ilegal nga pagpamutol og kahoy sa sitio Campensa, barangay Manipis kinsa giingong ang nalambigit mao ang igsuon ni Mayor Johnny De los Reyes.
Matud sa mayor nga dakong pagpakauwaw sa iyang pamilya ang gibuhat ni Bacaltos ug buot niya kining mangayo og pasaylo kay kun dili iyang kasohan si Bacaltos.
Apan si Bacaltos nga nahinabi sa mga tigbalita kagahapon nagkanayon nga wala siya’y nahimong sayop sa iyang gibuhat ug dili siya angayang mangayo og pasaylo.
Gipasabot ni Bacaltos nga igo lang siyang mihatag og pagtagad sa reklamo sa presidente sa farmer’s organization sa lugar nga si Leo Togonon kinsa maoy kanhi kapitan sa barangay Manipis.
Si Bacaltos kinsa maoy chairman sa committee on environment nagkanayon nga ang katawhan maoy nibotar kaniya aron mahimutang siya sa pwesto ug angayan lang nga hatagan niya og pagtagad ang mga reklamo sa katawhan nga gipadangat ngadto kaniya.Kahinumduman nga giingong usa ka “Wilfredo De los Reyes†nga giingong igsuon sa mayor ang nalambigit sa pagpamutol sa walo ka punoan sa Mahogany ngadto sa Campensa. Apan ang mayor namalibad nga wala siya’y igsuon nga gipanganlan og “Wilfredo.†Niadtong Huwebes sa buntag si Bacaltos uban sa mga sakop sa media misaka ngadto sa lugar diin gipamutol ug matud sa konsehal nga dihang gipakita niya ang hulagway ni Joel De los Reyes ngadto sa ubang mga residente mikompirma sila nga mao kini ang giingong nalambigit sa pagpamutol sa mga kahoy.
Si Joel kinsa maoy hepe sa motorpool sa siyudad mihimakak nang daan sa maong pasangil batok kaniya, kini dihang gikomprontase siya sa mayor kung duna ba siya’y kalambigitan sa maong pagpamutol og mga kahoy.
Matud ni Bacaltos nga atubangon niya ang kasong giingong ipasaka sa mayor batok kaniya apan ang konsehal mibahad nga kung dili mapamatud-an sa mayor nga duna siya’y nahimong kalapasan mosumbalik usab siya og pasaka og kaso.
Si Talisay City Administrator John Yre De los Reyes, anak sa mayor nagkanayon nga sayop ang gihimo ni Bacaltos sa privilege speech niini nga dili sigurado ang impormasyon. (/EIM)(BANAT NEWS)