Drayber gitiketan kay nanigarilyo

CEBU, Philippines - Drayber sa garbage truck sa Barangay Tinago giisyohan og Citation Ticket sa mga sakop sa City Environmental Sanitation Enforcement Team (CESET) human masakpi nga nanigarilyo samtang nagmaneho sa sakyanan sa barangay.

Ang pangulo sa CESET nga si Grace Luardo miingon nga ang gihimo sa drayber nga si Johann V. Bondoc nga pagpanigarilyo samtang nagmaneho sa trak sa basura sa barangay usa ka kalapasan sa Cebu City Ordinance 2241.

Matud ni Luardo nga kun si Bondoc dili mobayad sa iyang multahanan mapugos siya sa pagpasaka og kaso batok sa mao nga drayber sa garbage truck adto sa Municipal Trial Court in Cities (MTCC).

Gipahimangnoan ni Luardo ang ubang drayber nga mga hilig kaayo manigarilyo nga dili nila kini buhaton kun anaa sila sa sakyanan.

Samtang 36 na ka drayber sa mga passenger jeepney nga nagbiyahean dinhi sa dakbayan sa Sugbo ang naisyohan usab og Citation Ticket nila ni Luardo kay wala magbutang og basurahan sulod sa ilang sakyanan.

Ang mga drayber sa PUJ gimandoan, basi sa ordinansa sa dakbayan, nga magbutang og duha ka basurahan nga alang sa mga malata ug dili malata nga sagbot.

Nabantayan nga ang mga pasahero diretso ra nga molabay sa ilang mga sagbot ngadto sa karsada kun ang mga public utility vehicles (PUV) walay garbage bins.   (BANAT NEWS)