CEBU, Philippines - Tiguwang nga katabang sa panimalay nga giingon nga may deperensiya sa pangisip miuli sa kwarta ug alahas nga gipanag-iya sa iyang agawon nga gikuha niya atol sa iyang pagpanglaba.
Ang kwarta ug alahas nga gikuha ni Milagros Tecson, 62, mokantidad og P130 mil. Si PO2 Nikki Carlo Plarisan, desk officer sa Minglanilla Police Station, miingon nga ang tag-iya sa kwarta ug alahas nga si Evangeline Montecillo, 84, molupyo sa Poblacion Ward 2, Minglanilla nangayo kanila og tabang.
Gisaysay ni Montecillo nga nalimot siya pagkuha sa iyang alahas gikan sa bulsa sa iyang short pants nga gipalabhan ni Tecson. Sulod sa bulsa sa sapot ni Montecillo ang duha ka set sa white gold nga ariyos ug sing-sing, usa ka white gold nga kwentas, bulawan nga ariyos nga may Diamond, bulawan nga bracelet ug kwentas lakip na ang P4,500.
Giadto sa kapolisan ang balay ni Tecson ug ila kining gipangutana kabahin sa mga alahas ug salapi. Ang tiguwang nga labandera miuli sa mga gikuha niya nga alahas ug kwarta.
Ang tag-iya sa alahas ug kwarta nalooy na lang sa iyang tiguwang labandera ug wala na lang mopasaka og kaso. (BANAT NEWS)