CEBU, Philippines - Gironda sa mga sakop sa National Bureau of Investigation inabagan sa Provincial Special Weapons and Tactics ug Provincial Womens Commission ang usa ka templo sa kulto nga miresulta sa pagkasikop sa lider niini sa barangay Buanoy sa lungsod sa Balamban kagahapon sa buntag.
Ang nasikop naila nga si Casiano Apduhan nga naila sa ngalan nga Tatay Loloy Jr. nga gikatahong lider sa kulto nga “Diyos Amahan†apan gihimakak niya kini. Gihimo ang maong pagpangronda subay sa search warrant nga giisyu ni Executive Judge Hermes Montero sa dakbayan sa Toledo aron unta luwason ang usa ka babaye ug sa pag-ugkat sa lawas sa 12-anyos nga bata’ng lalaki nga giingong gilubong sa tunnel ilawom sa balay.
Ang inahan sa na-rescue nga 33-anyos nga babaye midangop sa barangay tungod kay dunay nakatug-an kaniya nga ang iyang anak nga molarga unta sa Italy isip domestic helper naa diay sa balay ni Apduhan nga ilegal nga gi-detain. Busa midangop ang mga opisyal sa barangay ngadto sa Kapitolyo ug ngadto sa NBI nga mi-conduct og duha ka semana nga surveillance sa balay ni Apduhan.
Apan atol sa maong surveillance operation ang ginikanan ni Angelo Refuela, 12, miduol sa NBI tungod kay gusto nilang makuha ang patay nga lawas sa ilang anak nga gikatahong gilubong sa tunnel sa ilawom sa balay ni Apduhan.
Na-rescue sa NBI ang babaye ug naugkat ang patay nga lawas ni Refuela nga giputos og habol. Gihimakak hinuon sa suspetsado nga lider siya og kulto apan miangkon kini nga mananambal siya ug ang na-rescue nga babaye mipuyo lang sa iyang kabubut-on human siya natambalan.
Lakip sa gidala sa NBI ang asawa sa suspek Henrize Apduhan ug si Victor Fajardo aron ipaubos sa imbestigasyon. Ang suspek mao ang anak sa orihinal nga tambalan nga si Tatay Loloy nga gikatahong mobanhaw og patay ug mo-ayo og mga masakiton.
Matud pa nga mipasalig ang suspek nga banhawon ang bata sa tuig 2013 apan miabot na lang og 2014 wa gihapon mabanhaw ang maong bata.
Gihimakak kining tanan sa suspek ilabi na ang kabahin sa paglubong sa bata kay matud niya ang ginikanan sa namatay ang hilom nga milubong niini sa ilang tunnel dihang mibiya sila sa ilang panimalay aron mobakasyon sa kaulohan. Giandam pa sa NBI ang kaso nga ipasaka batok sa suspek ug gisusi pa kun unsay gikamatyan sa bata. (BANAT NEWS)