Sikyu nga miduaw sa jail gidakop kay nagdala’g armas

CEBU, Philippines - Gidakop sa jailguard on duty sa Mandaue City Jail ang usa ka tawo nga nagtinguha sa pagbisita og binilanggo  sa maong bilanggoan human madiskubrehi nga nagdala kini og armas alas-2 pasado ang takna kagahapon sa hapon.

Ang nadakpan mao si Louie Aballe, 35, taga Sitio Sudlon, Barangay Guizo, dakbayan sa Mandaue ug  ang nakadakop mao si JO1 Carlo Ungab nga maoy jailguard  on duty sa nahisgotang bilanggoan. Matud pa ni PO2 Hardly Cosido sa kapolisan sa Presinto 5 sa Mandaue City Police Office (MCPO) nga usa ka Archie Castañeda nga nabalhog sa maong bilanggoan ang bisitahon sa suspetsado.

Kabahin na sa seguridad ang pagrekisa sa tibuok lawas sa mga moduaw apan dihang gihimo nila kini kang Aballe nahikapan nila ang giluklok nga kalibre .38 nga adunay unom ka bala ug nagdala pa og laing unom ka bala nga reserba.

Gumikan niini dali nga gisakmit ang gidalang armas ug gidakop ang maong suspetsasdo nga nakaingon sa pagkabalhog niini sulod sa detention cell. Si  Aballe nga nahinabi sa Banat News miingon nga guwardiya siya sa usa ka establisamento sa maong dakbayan ug sa  pag-off sa iyang duty nakahunahuna siya sa pagbisita sa nabilanggo niyang higala. Giangkon niya nga nakalimot lamang siya sa pagtahan sa gidala niyang armas ngadto sa jailguard nga mi-inspeksiyon kaniya ug naratol na hinuon siya sa kahadlok dihang girekisa na siya tungod kay gawas nga wala siya makadala og lisensiya sa armas wala usab siya makadala sa  lisensiya isip gwardiya.  (BANAT NEWS)