CEBU, Philippines - Nasikop sa kapolisan ang usa ka lalaki nga mitulis sa iyang silingan sa barangay Lorega-San Miguel samtang sakay sa usa ka jeep pasaheroan, cellphone sa biktima nabawi diha sa balay sa suspek samtang iya kining gi-charge sa miaging gabii.
Ang nasikop naila nga si Vergilio Maglinte, 18, molupyo sa nahisgotan nga lugar samtang ang mga biktima mao sila si Marceline Macabudbud, 27, taga Tres Borces, Mabolo ug si Hazel Arsenal, 21, taga Lower Caretta nga kasikbit barangay sa suspek.
Si PO2 Philip Taborada sa Theft and Robbery Section sa Cebu City Police Office miingon nga nasikop nila ang suspetsado sulod sa panimalay niini sa sitio San Miguel nga lakip sa mga balay nga wa maapil sa sunog. Gipangita pa ang kauban niyang naila lang sa pangalan nga Atan. Dugang ni Taborada nga gi-charge pa sa suspetsado ang duha ka cellphone nga ilang nakuha sa mga pasahero sa jeep nga ilang gitulis. Apan walay swerte si Maglinte tungod kay ang usa sa ilang gitulis nakaila diay kaniya ug silingan ra sila og barangay.
Matud ni Taborada nga mi-report sa ilang buhatan ang mga biktima hinungdan sa gilusad ang hot pursuit operation nga miresulta sa pagkasikop kang Maglinte ug pagkabawi sa mga cellphone ni Macabudbud.
Si Maglinte nga nahinabi sa Banat News miangkon nga siya ang nanulis sa duha kuyog sa usa ka “Atan†kinsa mao gyuy utok sa maong krimen kay igo ra siyang midawat sa kinuha nga cellphone gikan sa mga biktima. (BANAT NEWS)