PRO7 nangandam kontra pag-atake sa NPA

CEBU, Philippines - Giisa sa heightened alert status sa hepe sa Police Regional Office 7 Chief Supt. Danilo Constantino human sa pagkasikop sa magtiayon nga lider sa Communist Party of the Philippines niadtong Sabado sa gabii diha sa Aloguinsan.

Si Constantino miingon nga iya kining gibuhat agi og pangandam kun ugaling manimalos ang mga rebeldeng grupo sa kapolisan ug militar. Ang mga vital installations sa rehiyon hugot karong gipabantayan tungod kay posibleng mao kini atakehon isip mga ‘soft targets.’

Matud ni Constantino dunay mga police stations nga “vulnerable" sa mga pag-atake sa mga rebelde sa rehiyon ilabi na ang kapolisan sa lungsod sa Aloguinsan diin nadakpan ang maong mga lider sa mga rebelde ug sa ubang kalungsoran sa habagatang Sugbo.

Si Constantino  miingon nga padayon ang ilang monitoring sa kalihokan sa walhong grupo tungod kay sagad niini magtapok pa sila usa mohimo sa ilang sunod nga lakang. Si Costantino miingon nga mi-coordinate kaniya ang militar sa adlaw kun kanus-a sikupon ang magtiayon.

“Ganitong mga situation highly classified, yung operation pinapasa na lang on the day itself,” matud ni Constantino.

Matud pa ni Constantino nga ang Sugbo giisip sa mga NPA nga “white area” o ang lugar diin adto sila mag R and R (rest and recreation).

Dugang ni Constantino ang Sugbo usa ka lugar nga wala gyud nila gitandog tungod sa kadaghan sa mga polis ug sundalo apan bisan pa man niini mas pilion nga suroyan sa mga rebelde ang susamang mga lugar aron magplano.

Nagduda si Constantino nga duna pay mga laing dagkong opisyal sa walhong pundok nga anaa sa Sugbo gawas sa nadakpang magtiayong Benito ug Wilma Tiamzon nga ilang gi-monitor sulod na sa duha ka bulan.

Gisusi pa usab sa kapolisan ang background sa laing lima nga nasikop uban sa magtiayon.  (BANAT NEWS)