Nagmaoy gidunggab sa ama-ama
CEBU, Philippines - Grabeng naangol ang usa ka batan-on human gidunggab sa iyang ama-ama tungod sa pagmaoy niini diha sa sitio Nawanao, Barangay Subangdaku, dakbayan sa Mandaue alas 6 pasado ang takna sa miaging Sabado sa gabii.
Ang biktima mao si Ruel Colina, 21, ug ang suspetsado mao ang iyang ama-ama nga si Marlon Bercero, 39 anyos nga pulos nagpuyo sa maong dapit.
Si SPO1 Michael Limalima miingon nga sa imbestigasyon nga ilang gihimo maoy ilang nasayran nga gikan pa sa iyang trabaho ang suspetsado ug sa pagpauli niini maoy naabtan ang biktima nga nanghagis.
Gisulayan unta kini sa pagbadlong sa suspetsado apan misamot na hinuon kasuko ug tungod sa kapungot sa suspek nadunggaban niya kini sa abaga. Human sa maong pagdunggab dali nga gihatod ang biktima ngadto sa Vicente Sotto Memorial Medical Center sa dakbayan sa Sugbo samtang natanggong karon sa karsel ang suspetsado. (BANAT NEWS)
- Latest
