Patay ang apo, lolo grabe kay gidam-agan og motor

CEBU, Philippines - Patay ang singko-anyos nga bata’ng lalaki ug naangol ang iyang Lolo nga barangay tanod diha’ng nabanggaan sila og motorsiklo samtang naglakaw sila didto sa Barangay Binlod, Argao kaniadtong Sabado sa gabii.

Matud sa kapolisan nga ang namatay mao si Nathaniel Josh Cutillar kinsa nabagnos sa karsada kay nadagit sa motor og pipila ka metros. Ang iyang apohan nga si Nolberto Sabado, 55,  tanod sa barangay Binlod nakaangkon og mga bun-og.

Pareho sila nga gidali paghatud sa tambalanan apan ang bata gideklarar g’yud nga patay na.

Ang nagmaneho sa motorsiklo nga si Lucino Ido Jr, 38, sales technical representative ug molupyo sa Barangay Mantalungon, Dalaguete.

Base sa imbestigasyon sa kapolisan nga ang mga biktima naglakaw sa karsada diha nga gibanggaan sila sa motor.

Nakaangkon og grabe’ng kadaot sa iyang lawas ang apohan nga daling gidala sa Isidro Kintanar Memorial Hospital apan gibalhin kini sa tambalanan sa dakbayan sa Sugbo.

Si PO3 Renato Nacaytuna, desk officer sa Argao Police Station, miingon nga ang suspetsado gitanggong karon sa ilang bilanggoan samtang ang pamilya sa biktima wala pa mohukom kun pasakaan ba nila og kaso ang drayber. (BANAT NEWS)