CEBU, Philippines - Ilahos og pasaka sa National Bureau of Investigation (NBI-7) ang kaso batok sa mga sakop sa Highway Patrol Group-7 kung di sila mosanong sa subpoena nga ipadala kanila karong semanaha, ang subpoena may kalambigitan kini sa pagbanhig patay ni Atty. Noel Archival ug mga kaubanan sa Coro, Dalaguete niadtong nakalabay nga bulan.
Paabuton sa NBI-7 ang hepe sa HPG-7 nga si Supt. Romualdo Iglesia ug mga sakop nga sila si Sr. Insp. Eduardo Mara, Sr. Inp. Joselito Lerion ug SPO4 Edwin Galan pagsanong sa summon aron pangutan-on kabahin sa nasakmit sa NBI nga sakyanan nga gituohang maoy gigamit sa pagbanhig sa mga biktima diha mismo sa ilang impounding area sa Sudlon, Lahug sa miaging semana.
Sigon pa sa bag-ong regional director sa NBI-7 nga si Atty. Max Salvador nga importante kaayo nga tubagon sa maong mga polis ang imbestigasyon.
Ang NBI nangandam na alang sa ilang pagsang-at og kasong multiple murder and serious physical injury ngadto sa buhatan sa provincial prosecutors' office ug kung di mopatim-aw ang upat sa ilang buhatan idiretso na nila og duso ang kaso.
Gipaniguro hinuon sa director sa NBI-7 nga ang ilang buhatan mosubay gihapon sa tukmang proseso sa pagpalig-on ug pagpasaka sa maong kaso. Nasayran nga niadtong nakalabay nga adlaw, gikuha sa NBI ang usa ka pula nga Toyota Vios nga may plate number GSC 675 ngadto sa impounding area sa HPG-7 pinasikad sa search warrant sa korte nga gipirmahan ni RTC-7 Executive Judge Soliver Peras. Ang sakyanan gidudahang usa sa mga sakyanan nga gigamit sa mga mi-ambush sa mga biktima.
Ang tigpamaba sa HPG-7 nga si Sr. Insp. Oliver Plania mihimakak nga nagtagotago ang ilang labaw tungod sa naasoy nga kaso kay andam nila kining tubagon. (BANAT NEWS)