CEBU, Philippines - Dul-an otso mil ka mga babayeng tinun-an ang nakakompleto na sa ilang libreng cervical cancer vaccine kagahapon dinhi sa dakbayan sa Sugbo. Ang libreng cervical cancer prevention vaccine mipahigayon og pagpamakuna sa 42 ka elementary schools kagahapon.
Ang Human Papilloma Virus o HPV school-based vaccination usa ka hiniusang programa nga gipasiugdahan sa Department of Health, Department of Education ug Merck Sharp & Dohme (MSD) ug inabagan sa National Youth Commission.
Ang pagpamakuna kagahapon maoy ikatulo ug kataposang dosage sa maong bakuna sa MSD inabagan sa DOH nga nangusog karon sa kampanya batok sa cervical cancer, ang nag-unang hinungdan sa pagkamatay sa kababayen-an dinhi sa nasud, matud pa dose ka mga babaye ang mamatay matag adlaw tungod sa cervical cancer.
Ang unang dosage gihatag niadtong Septiyembre sa milabay’ng tuig diin 7,742 gikan sa 8,122 ka eligible nga tinun-an sa Grade 5 nga nag-edad og 10 ngadto 14 ang gibakunahan.
Ang booster vaccine gihatag niadtong bulan sa Nobiyembre ug kagahapon mao na ang kataposang dose sa maong medisina.
Si Doctor Eugenia Mercedes Canal, OIC chief sa DOH 7 NCD mipasabot kung unsa ka mahinungdanon ang proteksyon sa kababayen-an sa sayong bahin palang sa ilang kinabuhi aron dili sila mataptan og HPV-related diseases.
"As early as possible, we want to protect our children from threats specifically HPV related diseases including cervical cancer which is number four cause of death in women," matud pang Canal. (Edwin Ian Melecio gikan sa The Freeman/EIM)