CEBU, Philippines - “Bisan ika-1000 pa ko ipa-lie detector ug ika-1000 pa nako ipa-ballistics examination akong armas okay ra nako.†Kini maoy gibuhiang pamahayag ni Chief Insp. Eduardo Mara, Deputy Regional Director sa Highway Patrol Group-7 human usa siya sa gialegar nga nalambigit sa pag-ambush ni Atty. Noel Archival ug duha ka mga sakop niini nga sila si Candido Miñoza ug Alejandro Jaime ug miangol sa lain usa nga si Paulo Cortez.
Si Mara naapil sa mga pangalan sa respondents sa search warrant nga giisyu ni Judge Soliver Peras nga gi-serve sa National Bureau of Investigation (NBI)-7 niadtong Huwebes.
Gawas ni Mara, apil usab sa nakabutang sa maong warrant sila si HPG-7 Sr. Supt. Romualdo Iglesia, Sr. Insp. Joselito Lerion ug SPO4 Edwin Galan. Matud pang Mara wa siya’y kalibotan kun nganong giapil iyang pangalan sa search warrant nga ang mga gi-impound nga mga sakyanan ilawom man sa Special Operations Team (SOT) nga gipangulohan ni Lerion.
“Di ko katubag nganong makaabot sa gawas ang mga sakyanan nga impounded sa sulod if it is personal use,†matud pang Mara sa press conference kagahapon.
Gawas sa pagkahimong luyo-luyong hepe sa HPG-7, si Mara usab maoy hepe sa HPG-province, administrative officer, ug clearance officer sa maong police unit. Misugyot siya karon nga kinahanglang himoan og parallel investigation ang SOT.
Samtang ang tigpamaba sa HPG-7 nga si Sr. Insp. Oliver Plania mibutyag nga ilaha unang susihon sa NBI kun unsay ilang basehanan sa search warrant ug kun giunsa pagkaunsaha nga naapil man ang ilang buhatan sa maong kaso.
“HPG will answer their allegations in due time and with regards to the “impounded†vehicle, we are to check it first at the impounding area with Capt. Lerion,†matud niya ug midugang nga ilaha usab susihon ang case record aron matan-aw ang background sa Toyota Vios (GSC 675).
Nakasabot si Plania nga si Archival maoy abogado sa mga reklamante batok sa HPG apan matud pa niya gihimo lang sa HPG ang ilang trabaho.
Sa laing bahin, nagtagbo kagahapong adlawa ang mga sakop sa Special Investigation Task Group Archival ug ang mga kadagkoan sa National Bureau of Investigation-7 alang sa sunod nila nga buhaton. Si NBI-7 Regional Director Max Salvador nga nahinabi sa mga tigbalita miingon nga kun unsa man gani ang masabotan sa case conference nga ilang gipahigayon maoy buhaton sa grupo.
Matud pa ni Salvador nga posibleng pasakaan nila og kaso ang mga suspetsado sa sunod nga semana.
Sa iyang bahin si Cebu Provincial Governor Hilario Davide III miingon nga nalipay siya sa dagan sa kaso sa pagbanhig patay ni Archival.
Nagtuo siya nga posible nga dunay mga polis nga nalambigit sa maong pagbanhig ilabi na nga didto narekober ang usa ka puwa nga Vios sa impounding area mismo sa Highway Patrol Group.(Bryner L. Diaz ug report gikan sa The Freeman/EIM)