Daghang video karera sakmit sa Talisay

CEBU, Philippines - Miabot na og siyam ka video karera machines ang nasakmit sa kapolisan sa Talisay sulod sa duha ka semana nila nga pagbanhaw sa paspas nga kampanya batok sa illegal nga sugal.

Apan hinoon ang kapolisan napakyas pagdakop og bisan usa ka operator niining mao nga mga video karera kay sagad sa mao nga sugalan anha ra ibutang sa mga payag-payag nga wala’y muangkong tag-    iya.

Matud ni Talisay police chief Resty Santos nga ang mga tawo usab nga magduwa sa video karera moalibwag pagpanagan inig-abot sa kapolisan ug wala’y bisan usa kanila nga nasikop.

Si Santos miingon nga nakadawat sila og report ingon man reklamo gikan sa mga ginikanan nga mibalik ang video karera sa ilang lugar mao nga gihimoan dayon nila og operation.

Matud ni Santos nga dunay mga asawa nga nangreklamo kay ang ilang mga bana “na-ungo” sa video karera nga kanunay laing gastohon ang kwarta nga alang unta sa ilang pagkaon og musangpot sa ilang away.

Gawas sa video karera, ang kapolisan sa Talisay mihingusog usab sa kampanya batok sa masiao ug ubang matang sa illegal nga sugal. Aduna sila’y target nga mata’g semana kinahanglang makadakop sila og tulo ka malapason sa balaod sa illegal nga sugal.

Sa sayo pa ang kapolisan sa Talisay gipasanginlan nga kakonsabo kini sa mga tigpasiugda sa illegal nga kalihukan, ilabi na ang tigbaligya og shabu.

Kini maoy rason nga si Mayor Johny Delos Reyes nagtinguha nga pahulipan niya si Santos pagka hepe sa Talisay Police Station tungod sa report nga adunay mga polis nga adik ug nagproteher sa mga druglord.  (/RUB)(BANAT NEWS)