Wanted, amigo gipamusil patay

CEBU, Philippines - Patay ang duha ka lalaki nga gipusil sa wala mailhing tawo diin usa niini wanted sa kasong rape sa sitio Caminoan, barangay Liboron nga nahimutang sa bukirang bahin sa lungsod sa Carmen.

Si Chief Inspector Alvin Balio,hepe sa kapolisan sa maong lungsod miila sa mga biktima nga mao sila si Vincent  Malinao alyas Dandan, 22, taga Barangay Dawis sa nahisgotang lungsod ug Rannie Pundador, alyas Jonathan, taga Barangay Dawis ug giingong most wanted person sa maong lungsod tungod sa kasong pagpanglugos. Matud pa ni Chief Inspector Balio nga si Pundador nakabaton og samad pinusilan sa iyang tiyan diha sa abandonadong balay nga gipanag-iya sa usa ka Silverio Cuizon.

Dugang pa niya nga 500 metros nga gilay-on  nakaplagan usab nila ang patay’ng lawas ni Malinao nga nakabaton usab og samad pinusilan sa iyang dughan ug 16 metros usab nga gilay-on gikan sa maong patay’ng lawas ilang nakaplagan ang usa ka kalibre .45 nga ang magazine adunay upat ka mga bala.

Si Balio miingon nga ilang nadawat ang taho pinaagi kang Liboron Barangay Kapitan Felimon Lao nga nahidangat sa ilang buhatan ug mitug-an nga alas-8 pasado ang takna sa gabii niadtong Miyerkules nakadungog sila og mga buto sa armas  diha sa maong dapit.

Matud pa ni Balio nga wala pa sila masayod sa motibo sa maong pagpatay sa duha nga gituohang nagkuyog nianang tungora. Si PO3 Jerome Quimque, desk officer nga nahinabi sa Banat News miingon nga posibli nga mga tawo nga nagdumot kang Pundador ang responsable sa kamatayon sa duha.

Si Pundador may standing warrant of arrest sa kasong rape sumala pa ni Quimque ug pipila na ka higayon nga ilang giadto ang biktima apan pakyas sila pagsikop nini.(/EIM)(BANAT NEWS)