Seminar vs. Human Trafficking
CEBU, Philippines - Ang mga tag-iya og beach resorts ug mga hotel dinhi sa Sugbo patambongon og seminar aron masayod sila unsaon nga makatabang sila sa kagamhanan sa kampanya batok sa human trafficking.
Ang seminar nga hayan pagahimoon sa dili pa ang buwan sa Hunyo dumalahon sa Regional Anti-Human Trafficking Task Force kang kansang mga sakop nagtoo nga ang mga tagdumala og hotel ug beach resorts makatabang kaayo sa ilang kampanya.
Si Inspector Sheryl Bautista miingon nga sa miaging tuig pa nila giplano ang pagpahigayon og seminar apan tungod sa sunod-sunod nga mga katalagman karon lang kini mapatuman.
Matud ni Bautista nga dako kaayo og ikatabang ang mga tagdumala og hotel ug beach resorts kay kasagaran nga mahitaboan sa mga trafficking mao ang mga hotels ug resorts.
Si Bautista miingon nga adunay kaso sa miaging tuig nga nadakpan nila ang usa ka tawo nga mimolestiya sa usa ka menor de edad sulod sa usa ka hotel.
Dugang ni Bautista nga ila na nga gisugyot sa mga opisyal sa probinsya sa Sugbo ang pag-seminar sa tanang tagdumala og mga resorts ug hotels sa lalawigan. (BANAT NEWS)
- Latest
