CEBU, Philippines - Ang kadagkoan sa Department of Health (DOH) mitataw nga dili na mahimong madeklarar nga “Rabies Free†ang probinsya sa Sugbo kay daghan kaayo nga mga iro nga gipangbuhian lang.
Si Renan Cimafranca, hepe sa Regional Epidemiology Statistics and Surveillance Unit (RESSU) sa DOH-7, mipasabot nga madeklarar ang usa ka lugar nga rabies free kun wala g’yuy matala nga tawo nga napaakan og iro nga aduna’y rabies sulod sa sunod-sunod nga tulo ka tuig. Matud ni Cimafranca nga dinhi sa Sugbo lisod pa sa pagkakaron nga madeklarar kini nga rabies free tungod sa kadaghan sa populasyon sa irong gipangbuhian.
Daghan pa usab nga mga tawo nga wala kaayo magtagad sa ilang binuhing iro ug gipasagdan lamang kini nga kuwang sa pagkaon, walay bakuna ug labaw sa tanan wala gihigtan.
Si Cimafranca hinoon mitataw nga wala pa’y kaso dinhi sa Sugbo karong tuiga nga adunay tawo nga namatay tungod sa pinaakan sa iro nga may rabies.
Kini human masuta sa ilang buhatan nga dili pinaakan sa iro ang hinungdan sa kamatayon sa usa ka molupyo sa syudad sa Sugbo niadtong bulan sa Enero nga unang gikataho nga napaakan sa libod-suroy nga iro. Kaniadtong miaging tuig, ang RESSU naka-record og upat ka tawo nga namatay human mapaaki sa iro nga may rabies. (BANAT NEWS)