CEBU, Philippines - Usa ka balay ang hingpit nga naugdaw ug laing balay usab ang nakaangkon og kadaut dihang miulbo ang sunog didto sa Barangay Cantabaco, dakbayan sa Toledo kaniadtong Martes sa hapon.
Si SFO2 Constantino Alcover sa Toledo City Fire Station miingon nga hingpit nga naugdaw ang balay ni Analie Villanueva ug swerte nga wala mahurot pagkaugdaw ang panimalay ni Nericto Cansana.
Matud ni SFO2 Alcover nga nadawat nila ang alarma sa sunog ala 1:30 sa hapon kaniadtong Martes ug paglabay sa diyes minutos human sila miabot sa dapit nakontrolar dayon nila ang sunog.
Walay naangol atol sa mao nga sunog nga matud ni SFO2 Alcover naggumikan sa naputol nga alambre sa kuryente sa CEBECO III ug didto mahulog sa balay ni Villanueva.
Gibana-bana hinoon sa kabomberohan nga ang danyos sa sunog sa balay ni Villanueva ug Cansana moabot lang og P25 mil. (BANAT NEWS)