CEBU, Philippines - Kadtong mga tawo nga magsul-ob og maskara o magtaptap sa ilang nawong didto sa dakbayan sa Bogo, apil na ang magmaneho’g motorsiklo, dakpon na ug pamultahon sa kantidad nga muabot og P5,000.
Kini human gipasar sa konseho sa syudad ang ordinansa nga nagdili ni bisan kinsa nga magmaskara ug magsul-ob og uban pang tabon sa nawong. Ang ordinansa gipirmahan na ni Mayor Celestino Martinez Jr.
Tumong sa ordinansa nga masanta ang bisan kinsa nga nagtinguha nga mohimo og krimen pinaagi sa pagtago sa ilang panagway. Ang ordinansa gisugyot ni Konsehal Rhett Minguez. Multa nga P1,000 ug usa ka adlaw nga pagkapriso ang ipahamtang sa makahimo’g kalapasan sa unang higayon; P2,000 ug duha ka adlaw nga pagkapriso sa ikaduhang kalapasan ug P5,000 ug usa ka buwan nga pagkabilanggo sa ikatulong kalapasan.
Ang kapolisan sa dakbayan sa Bogo unang nirekomendar sa pagpasar sa maong ordinansa aron maalkontrahan nila ang paghimo og bisan unsa nga binuang sa ilang dapit.
Nakita sa konseho nga makatarunganon ang tumong sa kapolisan aron pagsanta sa mga dautang elemento nga mohimo og krimen.
Gawas sa kapolisan, gihatagan og katungod nga makadakop sa magmaskara ang mga opisyal sa kabarangayan, traffic enforcers, ug mga tanod. - /RUB (BANAT NEWS)