Payroll sa hardware gitulis

CEBU, Philippines - Mga kawani sa usa ka hardware ang wala masweldohi human ang ilang accountant nga nag-andam sa payroll gitulis sa usa ka wala mailhing tulisan niadtong Sabado sa hapon.

Ang nahisgutang hardware mao ang Alliance Hardware, Incorporated sa Legaspi Extension, barangay San Roque, dakbayan sa Sugbo.

Sa imbestigasyon sa kapolisan usa ka wala mailhing lalaki nga nagdala og knapsack ang misulod diha sa accounting office sa nahisgutang hardware ug miduol sa accountant nga si Geodofreda Demecillo kinsa niadtong higayona nagbuhat og payroll ug nagkwenta sa kwarta nga isweldo sa mga kawani.

Ang maong lalaki giingong mition og pusil sa ulo ni Demecillo ug gikuha ang P168 mil nga kwarta.

Dihang paingon nang mogawas ang maong tulisan giingong gihapit pa niini og kuha ang iPhone 5s sa assistant finance manager nga si Joanne Mae Lim ug ang iPhone 3GS sa phone collector nga si Marlitz Noval nga gibutang diha ibabaw sa ilang lamesa sa opisina niadtong higayona.

Ang maong tulisan gihulagway nga 5’4 ang gitas-on, kasarangan ang gidak-on sa lawas ug tabonon ang pamanit daling misibat sakay sa usa ka motorsiklo pahilayo sa lugar.

Sa samang adlaw, ang Botikang Pinoy Pharmacy diha sa dalan N. Bacalso, dakbayan sa Sugbo ang giingong gikawatan sa usa ka wala mailhing lalaki kinsa mitabon pa sa Close Circuit Television (CCTV) camera og karton.

Si Jeanne Rose Tiodianco misumbong sa kapolisan sa hitabo ug matud niini nga dihang nagpahigayon sila og imbentaryo nadiskubrehan nilang giguba ang bungbong sa storage room.

Upat ka nebulizer machine nga nagkantidad og P1,800 matag usa ang nadiskubrehang nawagtang.  - /EIM (BANAT NEWS)