Siyam ka “hugawan” sa Talisay nadakpan

CEBU, Philippines - Siyam na ka tawo ang nangadakpan sukad nga gipatuman sa Talisay City ang  ordinansa nga Comprehensive Waste Management System o Anti-Littering Law niadtong Marso 1, 2014.

Ang kagamhanan sa siyudad mipahibawo ngadto sa publiko sa milabay’ng mga semana kabahin sa implementasyon sa maong ordinansa human ang merkado sa Tabunok gibahaan ug natanggong ang tubig sa kanal tungod sa basura.

Duha ka tawo nga nanglimpiyo sa kanal ang nangamatay dihang nangahilo sa methane gas gikan sa mga basurang nangadugta sa maong imburnal.

Sa unang adlaw sa implementasyon sa ordinansa, siyam dayon ka tawo ang nangasikop nga nagpataka og labay sa ilang mga basura. Ang siyam gipamulta og P300  nga maoy silot sa unang higayon nga makalapas sa ordinansa. Kun makasala sila sa ikaduhang higayon, P500 na ang multa ug P1,000 sa ikatulo ug kung dili makabayad mopaubos sila sa community service.

Si Mayor Johnny De los Reyes nagkanayon nga buot niyang malimpiyo ang palibot sa Talisay ug madesiplina ang publiko.

Ang mga sakop sa flying squad maoy gisangonan sa pagsikop sa mga magpataka og labay og basura lakip na ang magpataka og pangihi. “Mao ning panahona nga kun duna mo’y ilabay nga basura sama sa papel o putos sa kendi o opus sa sigarilyo ayaw mo pataka og labay. Mao ni gitawag nga “basura mo, ibulsa mo,” ni De los Reyes pa. - /EIM (BANAT NEWS)