CEBU, Philippines - Ang Korean foundation nga Tema Sek Foundation ug Langyang Technology sa Singapore migahin og P4 milyones nga budget alang sa pagpaayo sa duha ka andanang building sa tunghaan sa Cabancalan National High School sa dakbayan sa Mandaue.
Ang maong edipisyo grabe kining naapektohan sa miigong 7.2 magnitude nga linog ug ang pagpaayo niini gipahigayon niadtong buwan sa Disyembre sa milabay’ng tuig ug niadtong Huwebes sa hapon gihimo ang turnover ceremony.
Ang structural engineers nga misusi sa maong edipisyo human sa linog mipahibalo nga kuyaw na kining mahugno.
Ang mga opisyal sa Tema Sek Foundation ug Langyang Technology dali nga nakigtagbo kang Mayor Jonas Cortes ug mitanyag nga mopaayo sa maong building.
Si Engr. Nelson Abenoja nga maoy contractor sa pag-ayo sa edipisyo maoy mitugyan niini ngadto sa kagamhanan sa dakbayan nga gipangulohan ni Cortes ug mitugyan usab sa maong edipisyo ngadto kang Dr. Virginia Zapanta nga maoy school division superintendent sa Department of Education (DepEd) Mandaue City Division. (Romeo T. Limpangog/BDB)
Nahugnong minahan buot ayohon
Ang Department of Energy (DOE-7) nipahibawo nga ang SKI-Energy Resources Inc. (SERI) Mining Corporation nihangyo nga ilang ayohon ang nahugno nga minahan didto sa barangay Dunga, siyudad sa Danao.
Si DOE-7 Regional Director Antonio Labios nagkanayon nga nadawat sa ilang buhatan ang hangyo sa SERI Mining Corp.nga repair and maintenance niadtong nakalabay nga Biyernes.
Tungod niini nibalik ang DENR sa naasoy nga minahan aron pagpahigayon og pagsusi sa kadako sa kadaot sa maong minahan.
Gitug-an ni Labios nga tun-an pa sa iyang buhatan ang hangyo sa kompanya nga padak-an ang baba sa maong minahan ug palig-onon ang mga ekipo aron dili na kini mahugno.
Iyang gipahibawo nga makatarunganon ang gipangayo sa minahan apan kinahanglan nga motuman sa mga rekisitos.
Wala pa hinuon mohatag og kasayoran si Labios sa resulta sa ilang imbestigasyon sa hinungdan sa pagkahugno sa minahan nga nipatay og usa ka minero ug niangol sa laing tulo ka minero. (/BDB)(BANAT NEWS)