142% ang pagsaka sa sunog dinhi sa CV

CEBU, Philippines -  Insidente sa sunog sa Sugbo gikan sa Enero ug Pebrero ning tuiga misaka sa 142%  kun itandi sa samang panahon sa miaging tuig base sa datus sa Bureau of Fire Protection 7.

Base sa datus nga nakuha sa Banat News, duna nay 114 ka mga insidente sa sunog ang natala sa Sugbo kompara sa 47 lang sa miaging tuig. Samtang sa Bohol gikan sa 11 misaka kini sa 25 ka insidente o 66.66% nga misaka ang mga insidente sa sunog.

Sa Negros Oriental 75% ang pagsaka sa mga insidente sa sunog nga gikan sa 20 karon mitala na kini og 35.  Apan sukwahi ang nahitabo sa dakbayan sa Lapu-Lapu nga mikunhod kini niining tuiga gikan sa upat ngadto lang sa tulo ka insedente sa sunog.

Kun sumadahon gikan sa 88 niadtong tuig 2013 misaka kini sa 181 o 105% karong tuiga.

Apan matud pa ni Insp. Rodrigo Nayne ang hepe sa Regional Intelligence Investigation Section 7 nga wala magkuwang ang kabomberohan sa pagpahimangno aron malikay sa sunog ang katawhan.

Ang bulan sa Marso mao ang bulan diin gisaulog sa Bureau of Fire Protection nga Fire Prevention Month. (BANAT NEWS)