Mactan Circumferential Road nalangan

CEBU, Philippines -  Ang kagamhanan sa dakbayan sa Lapu-Lapu nagtinguha gayud nga mahuman karong bulana ang Circumferential Road Project gikan sa Barangay Mactan hangtod sa Barangay Maribago.

Kini bisan pa og ang duha ka kontraktor napakyas paghuman sa ilang proyekto base sa gilatid nga petsa.

Matud ni Lapu-Lapu City Engineer Allan Pedrigal nga kaniadto pa’ng Marso 7 unta ang gikatakda nga paghuman sa maong proyekto apan pagka karon anaa pa sa 85% ang "project completion."

Si Pedrigal miingon nga ang Oaminal ug Venrey Construction kinahanglang mangayo og pagtugot sa Department of Public Works and Highways (DPWH) aron pagpangayo og lugway sa paghuman sa maong proyekto.

 Naglaum ang city engineer nga karong bulana mahuman na ang proyekto tungod kay aduna pa’y 28 ka adlaw nga "curing period" o pagpauga sa semento una pa kini maagian sa mga motorista.

Matud ni Pedrigal nga walay angay’ng kabalak-an sa mga barangay road projects nga gipatuman sa kagamhanan sa Lapu-Lapu kay padayon ang ilang pagtrabaho ug gikatakdang mahuman kini sa gitakdang tagal.

Mireklamo ang pipila ka tag-iya ug guest sa mga hotel, resorts ug restaurant sa dakbayan sa Lapu-Lapu nga apektado sa pag-ayo sa  karsada sa Barangay Mactan ug Maribago kay nahasol sila sa proyekto nga hangtod karon wala pa mahuman.   (BANAT NEWS)