40 ka paketeng shabu nasakmit

CEBU, Philippines -  Lalaki nga gidudahang drug pusher nasikop ug nakuhaan og 40 ka paketeng shabu sa sitio Lawis sa barangay Pasil pasado alas 11:00 sa miaging gabii.

Ang suspek naila nga si Jorsal Abesa, 33, molupyo sa nahisgotan nga lugar. Si Insp. Gomersendo Mandawe nga nahinabi sa mga tigbalita niingon nga samtang nag follow-up ang mga sakop sa City Intelligence Branch sa maong dapit tungod sa usa ka alarma sa tulis nasigpatan nila ang suspek.

Matud pa nagbitbit og usa ka gamay nga “jewelry box” si Abesa ug pagkakita niini sa mga polis gilabay niya ang maong box sa yuta ug midagan.

Dihang gipunit sa kapolisan ang box  duna kini sulod nga 40 ka gagmay nga pakete nga gituohang shabu.

Apan ang mga polis nga nakabantay migukod sa suspek hinungdan sa pagkasikop niini. Dihang nahinabi sa mga tigbalita ang suspek miingon kini nga bag-o pa lang siya sa maong illegal nga negosyo.

Ug matud pa ni Mandawe nga ang operasyon sa suspek diha lang sa maong dapit ug gikonsiderar kini nga level 2 drug pusher.

Gi-turnover na ngadto sa PNP Crime Laboratory 7 ang 40 ka paketeng shabu ug pasakaan og kasong kalapasan sa Section 5 ug 11 sa Article 2 sa Comprehensive Dangerous Drugs Act.  (BANAT NEWS)