CEBU, Philippines - Nasakpan na ‘sab nga tulo ka kawani sa Barangay Cambinocot ug upat sa Barangay Tinago, sakop sa dakbayan sa Sugbo, mga tigamitan diay og gidili nga matang sa drugas.
Sa Barangay Cambinocot, mga tanod ang napositibo sa kinalit nga drug test nga gipahigayon adtong Sabado samtang ang tulo ka kawani sa Tinago naglakip sa usa ka babaye napositibo sa drug test kagahapon.
Si Dr. Alice Utlang nga maoy hepe sa City Office for Substance Abuse Prevention (COSAP) wala kaayo mohatag og dugang detalyi sa gipahigayong drug test.
Matud ni Utlang nga ang mga kapitan sa duha ka barangay maoy nag-awhag nga himoan og kalit nga drug test ang ilang mga kawani aron mahibaw-an kinsa kanila ang badlongon.
Si Utlang miingon nga anaa ra sa mga kapitan ang paghukom kun ila ba nga taktakon sa serbisyo ang mao nga mga kawani nga napositibo.
Apan matud ni Utlang nga kun siya ang pahukmon angay’ng hatagan og laing higayon ang mao nga mga kawani apan kun dili sila mag-usab, diha pa sila nga palagputon sa trabaho.
Ang ngalan sa napositibo sa drug test dili ipabutyag sa publiko base sa gimbut-an sa balaod. (BANAT NEWS)