CEBU, Philippines - Nasikop sa kapolisan ang tulo ka mga lalaki lakip na niini ang usa ka menor nga gipasanginlang nangulata ug misukol sa taga Prevention, Restoration, Order, Beautification and Enhancement (PROBE ) atol sa clearing operation sa dalan Sanciangko ug Leon Kilat sa barangay Pari-an ning dakbayan sa Sugbo.
Ang nasikop naila nga si Rasheed Hadjirasul, 21, Salic Malawi, 22, nga taga Kinasang-an, Pardo ug ang usa ka 17-anyos nga lalaki. Base sa imbestigasyon sa kapolisan nga ang maong mga lalaki gidakop tungod kay wa mopatuo, misukol ug nangulata sa mga sakop sa Probe.
Pasado alas 7:00 nagpahigayon og clearing operation ang mga sakop sa PROBE tungod sa reklamo nga nakapahuot sa trapiko ang mga mamaligyaay og cellphone diha sa maong dapit.
Apan dihang gidakop ug gikompiskar sa PROBE ang ilang mga baligya nga cellphone nahitabo ang kagubot nga miresulta sa pagkaangol sa usa ka sakop sa PROBE nga nakaangkon og walo ka tahi sa iyang ulo.
Gitabangan sa unom ka vendor ang maong sakop sa PROBE nga daling gidala sa hospital. Samtang ang tulo ka suspetsado nga nahinabi sa Banat News miingon nga wala sila’y labot sa maong rambol si Malawi miingon nga igo lang siya mitan-aw ug nangutana tungod kay nakabantay siya nga nagkagubot.
Si Hadjirasul sab misugilon sa Banat News nga igo lang sab siya nga nagtan-aw ug miduol gikan sa iyang gitrabahoan nga internet shop sa atbang tungod kay nagkagubot na man ang maong lugar. Pasangil sa duha nga nagkagubot ang clearing operation tungod kay gibali-bali og sagpa sa usa ka sakop sa PROBE ang 8-anyos nga pag-umangkon nga lalaki ni Malawi.
Gihimakak usab nila ang pangangkon sa PROBE nga nadakpan sila atol sa kagubot, kay matud nila gidakop na silang daan una pa nahitabo ang kagubot. (/EIM)(BANAT NEWS)