Kababayen-an gitudloa’g panginabuhian sa rpsb-7

CEBU, Philippines - Labing unang livelihood program sa Regional Public Safety Battalion-7 ilusad karong adlawa sa barangay Colawin sa lungsod sa Argao.

Si Sr. Insp. Ma. Aurora Rayos ang hepe sa Police Community Relations sa RPSB miingon nga labing unang higayon nga gibuhat nila ang maong proyekto.

Ug napili nila ang barangay Colawin sa lungsod sa Argao nga adto ipahigayon ang maong  proyekto.

Sumala ni Rayos nga tumong nila nga matabangan ang mga asawa nga duna say panginabuhian ug aron duna say kalingawan samtang nagpaabot sa ilang mga anak nga gikan sa eskwelahan ug mga bana nga gikan sa trabahoan.

“Tagaan nato sila og kalingawan imbes nga mag-tsismis ma-busy na unya sila,” dugang ni Rayos.

Miingon si Rayos nga gihingusgan nila ang maong proyekto labi na nga gisaulog karon ang Women’s Month.

Tumong ni Rayos nga mahimong panginabuhian sa kababayen-an ang mga materyales nga naa lang sa ilang palibot sama sa tukog, lubi ug kawayan.

Tudloan ang maong mga babaye sa paghimo og basket nga ginama sa kawayan ug tukog lakip na sa paghimo og mga plato nga ginama sa tukog.

Plano sab ni Rayos nga matudloan ang mga babaye sa paglala og banig.  Matud ni Rayos nga duna sila’y giimbitar nga mga speaker nga maoy motudlo sa mga residente sa Colawin.

Ug kun mabaligya na sa merkado ang ilang mga produkto plano ni Rayos nga mo-tap og mga non-government organizations (NGOs) nga maoy motabang nila sa pag-market sa produkto sa taga Colawin. (/EIM)(BANAT NEWS)