CEBU, Philippines - Nabuslot ang sampot sa suspetsado’ng tulisan human kini gipusil sa polis kay wala mohunong samtang gigukod didto sa Highway Seno, Barangay Guizo, dakbayan sa Mandaue kaniadtong Biyernes sa hapon.
Ang napusilan mao si Marlo Neri Soronio, 20, taga Sitio Sta. Cruz, Barangay Guizo ug maoy gitudlo nga mitulis ni Gilbert Oblong, 28, nga drayber sa usa ka seafood restaurant sa dalan A.S. Fortuna.
Ang nakapusil ni Soronio mao si PO1 Vinar Evardo nga sakop sa beat patrol team ug nadistino sa Highway Seno.
Matud pa nga si Oblong nga taga dalan Velasquez, Sitio Fatima, Barangay Subang-daku nagmaneho og Mitsubishi L300 van sa ilang kompaniya ug mihunong atol sa stop signal.
Si PO1 Jenus Capangpangan, imbestigador sa Investigation Detection and Management Bureau (IDMB) sa Mandaue City Police Office (MCPO), miingon nga ang suspetsado nakamatikod nga abli ang front seat nga bildo sa pultahan sa L300 van.
Matud ni Capangpangan nga nagdali’ng miduol si Soronio sa sakyanan ug gitionan niya’g revolver ang drayber ug mideklarar nga tulis dayon gimandoan nga ihatag ang iyang selpon.
Ang tulisan midali pagsibat apan ang gitulis nga drayber nakakita ni PO1 Vinar Evardo nga nagbarog sa atbang nga eskina mao nga misinggit siya og pakitabang ug gitudlo ang mitulis kaniya.
Si PO1 Evardo dali nga migukod sa suspetsado ug gisinggitan pagpahunong ug gipasalbahan sa iyang armas.
Apan ang tulisan wala mohunong mao nga nahukman ni PO1 Evardo nga pusilon na lang sa sampot ang suspek hinungdan nga nadakpan.
Nakuha pagbalik gikan ni Soronio ang selpon sa biktima ug nasakmit usab gikan sa suspek ang kalibre 38 nga revolver nga adunay upat ka bala. (/RUB)(BANAT NEWS)