Lima nga ‘nanuyop’ nasikop

CEBU, Philippines - Lima ka lalaki kinsa giingong nag-pot session ang nasikop atol sa gipahigayong patrolya sa kapolisan niadtong Biyernes sa hapon diha sa sitio Hawod, barangay Bulacao, dakbayan sa Talisay.

Ang mga suspetsado mao sila si Brandon Villaver, Sherwin Duque, Jomar Barliso, Christian Rey Ababon ug Daryl Ababon, mga residente sa dakbayan sa Talisay.

Si SPO1 Isaias Cabuenas kinsa usa sa misikop sa mga suspetsado mibutyag sa Banat News kagahapon nga nakadawat sila og report kabahin sa ilegal nga kalihukan sa maong lugar.

Ang nakadakop sa lima gipangulohan ni Insp. Rodgene Fodutan diha sa sitio Hawod diin giingong naaktohan sa mga polis ang mga suspetsado diha sa usa ka payag nga gitabil-tabilan og sako nga nag-pot session.

Giingong naembargo sa mga polis gikan sa mga suspetsado ang mga drug paraphernalia. - /EIM (BANAT NEWS)