RTWPB ipawagtang
CEBU, Philippines - Ang Associated of Labor Unions Trade Union Congress of the Philippines (ALU-TUCP) moduso og balaodnon sa pagwagtang sa Regional Tripartite Wages and Productivity Board (RTWPB).
Sa interview sa radyo, si RTWPB-7 Labor representative Atty. Ernesto Carreon niingon nga si ALU-TUCP Partylist Representative Raymund Mendoza maoy moduso og balaodnon sa hingpit nga pagwagtang sa RTWPB ug ihatag na lamang sa Kongreso ang gahum sa pagtumbok sa wage increase sa mga mamumuo matag tuig.
Sigon pa ni Atty. Carreon nga kombensido na si Cong. Mendoza nga wagtangon na sa hingpit ang naasoy nga wage board tungod kay matud pa wa kini gamit sanglit nagpadala na man lamang kini sa pagtagad sa interest sa mga magpapatigayon ug dili sa kaayohan sa mga trabahante.
Si Atty. Carreon niingon nga iyang gisuportahan ang maong lakang bisan pa man og usa siya sa mga miyembro sa naasoy nga wage board.
Subli niining gipadayag ang dakung kasagmuyo sa wage board tungod sa nadesisyon nga wage order niadtong nakalabay nga bulan nga P13.00 nga Cost of Living Allowance (COLA) ang giaprobahan inay salary increase sa mga trabahante.
Alang kaniya usa ka dakung insulto sa mga mamumuo nga naglaum sa dakung usbaw sa suholan ang kaaprobahan tungod sa nahiagumang kalamidad apan zero wage increase ang gitugot niini.
Gipahibawo hinuon niini nga ilaha gihapong ipadayon ang ilang pag-apelar sa naasoy nga wage board ngadto na sa National Wage and Productivity Commission. (/BDB)(BANAT NEWS)
- Latest
