Demolisyon sa apas ipadayon karon

CEBU, Philippines - Ipadayon karong buntag ang demolisyon sa kabalayan sa 157 ka pamilya diha sa sitio San Miguel, Barangay Apas, ning dakbayan sa Sugbo human gihunongan kagahapon sa court sheriff subay sa hangyo ni Kapitan Ramil Ayuman.

Gisugdan ang demolisyon pasado alas-2 sa hapon apan naundang paglabay sa singko minutos una pa mag alas-3 human misugot sa hangyo ang court sheriff nga si Edilberto Surian.

Unang giguba sa demolition team ang balay ni Jose Bandilio ug ang katupad niining balay. Diriyot magkagubot sa dihang nisuway pagpugong ang mga tag-iya sa balay apan napugngan ra usab sa mga sakop sa kapulisan nga gipakatap sa demolition area.

Ang Cebu City Police Office (CCPO) nagpakatap og 15 ka personnel sa Special Weapons and Tactics (SWAT) team ug lain pang 50 ka pulis gikan sa mga nagkalainlaing police stations nga sakop sa CCPO.

Walay nahimo ang mga apektadong residente kundi naghinayhinay na lang paghakot sa ilang mga butang ug gipahiluna usa kini sa panimalay sa ubang residente nga wala pa ma-demolish.

Wala kapugngi ni Myra Gumajad ang pagtulo sa iyang luha pagkakita nga gipadayon gyud ang demolisyon.

Si Vivi Dalmacion, ang presidente sa Apas Urban Land Association Inc., miangkon nga wala gyud sila magtoo nga mahinayon ang demolisyon.

Ang maong yuta giangkon sa usa ka Aletha Suico-Magat nga gipaboran sa korte apan ang mga residente nagtuo nga iya sa gobiyerno ang maong luna.

Si Dalmacion nagkanayon nga nagplano sila nga magpahigayon og human barricade karong adlawa sa dili pa ipadayon ang demolition karong alas-8 sa buntag.

Si Ayuman miingon nga paabuton pa nila karong adlawa ang desisyon sa Korte sa ilang giduso nga motion for reconsideration.

Ang kapitan niawhag usab kang Gobernador Hilario Davide III nga mointerbiner sa maong problema kay matud niya ang  Kapitolyo man ang tag-iya sa maong mga luna.Daan na hinoon nga miingon si Davide nga ang yuta dili iya sa Kapitolyo. (Niña Sumacot-Abenoja/EIM)

Ash  Wednesday karon

Karong adlawa himuon ang Miyerkules sa Badlis kon Ash Wednesday, timaan sa pagsugod sa 30 ka adlaw nga Kuwaresma paghandom sa kamatayon ug pagkabanhaw ni Hesu Kristo.

Matapos ang kwaresma sa Biyernes Santo pagtimaan sa kamatayon sa Manluluwas sumala pa ni Episcopal Vicar Monsignor Esteban Binghay.

Dugang pa niya, kini usa ka paagi aron magpahinumdum kanato nga magpaubos aron di masugamak sa mas dakong problema.

"This makes us humble in order not to stumble. Kay naa man guy uban nga makalimot na ug manghambog na lang ug unsay naa sila. Ang liturhiya ugma (karon) maghisgot kang Propeta Joel kinsa misuwat nga ang Ginoo miingon 'balik kanako mga tawo.' Unsaon man pagbalik Kaniya? Duna tay tulo ka paagi nga mao ang fasting, alms-giving, ug praying," matud pa ni Binghay.

Giklaro ni Binghay nga ang pagpuasa wa magpasabot nga dili na mokaon ang usa ka tawo kun dili magpamenus lang sa gidaghanon sa pagakan-on ilabi na sa karne.

Ang masubra nga pagkaon gikan sa pagpuasa angay usab ihatag sa nanginahanglan ug kun mag-ampo kinahanglang kinasing-kasing gyud. Kadto lang himsog ang panglawas gikan sa 18-anyos ngadto sa 60-anyos ang mahimong magpuasa. Kadtong di makapabadlis karong adlawa mahimo gihapong moduol sa kura paruko sa ilang lugar aron magpabadlis. (BANAT NEWS)