Brgy officials kasohan kun di mobahig sa basura
CEBU, Philippines - Nibahad ang pangulo sa City Environment Sanitation and Enforcement Team (CESET) nga kasohan ang mga opisyal sa barangay kun dili motuman sa waste segregation policy nga gipanghingusgan karon sa kagamhanan sa dakbayan sa Sugbu. Ang pangulo sa CESET nga si Grace Luardo nagkanayon nga ila nang gisugdan ang implimentasyon sa pagbahig sa basurang malata ug di malata maong nakadakop sila og dul-an 200 ka mga drivers ug loaders sa mga garbage trucks sugod Marso 1.
Ang maong mga drivers ug loaders sakop sa City Department of Public Services (DPS) ug mga barangay, sila gipangisyuhan og mga citation tickets. Si Luardo nagkanayon nga sa sunod semana dili na citation tickets ang ilang iisyu, kondili ilaha na gyung pasakaan og kaso ang mga madakpan.
Matud pa ni Luardo ang pag-estrikto sa saktong paghipos sa basura gipasikad kini sa Republic Act 9003 kon Ecological Solid Waste Management Act.
Giawhag usab niya ang mga drivers ug ang barangay nga dili ma-discourage kun sila madakpan ug angayan nga ma-challenge sila nga malimpyo gyud ang ilang mga barangay.
Giawhag usab sa mga barangay officials kauban ang ilang nagkadaiyang Barangay Environmental Officers (BEO) nga awhagon gyud ang ilang mga residente sa pagtuman sa saktong pagbahig sa basura.
Si Luardo nagkanayon nga ang BEO gitahasan nga mo-issue usab og citation tickets sa pamilya nga dili motuman sa maong polisiya.
Ang matiketan pabayron og P500 isip multa kung dili paserbisyuhon sila sa komunidad.
Ang basurang malata kuhaon kada Lunes, Miyerkules, Biyernes ug Domingo samtang ang mga dili malata matag adlaw nga Martes, Huwebes ug Sabado. (/EIM)(BANAT NEWS)
- Latest
