Demolisyon sa Warwick-Barracks nagubot

CEBU, Philippines - Nagubot ang gihimong demolisyon sa mga stalls sa Warwick-Barracks sa barangay Ermita kagahapon sa hapon nga miresulta sa pagkasamad sa usa ka polis ug pagkadakop sa pito ka mga tawo nga giingong nanukol sa demolition team sa siyudad.

Ang mga nasikop naila nga si Gerson Lacaron, 24, Jonie Deligero, 27, Niño Jumag, 22, Robin Jumag, 20, Bobby Tio Capuno, 41, Renaldo Batoto, 28 nga puros taga Warwick ug si  Mark Anthony Abellaneda, 26, nga taga C. Padilla sa dakbayan sa Sugbo.

Matud pa nga gibabagan nila ang demolition team sa Prevention Restoration Order Beautification Enhancement (PROBE) nga gub-on ang mga stalls.

Si Kapitan Felicisimo “Imok” Rupinta nga nahinabi sa Banat News miingon nga nasagmuyo siya sa mga stall owners tungod kay mipasalig man sila sa kagamhanan sa dakbayan nga sila mismo ang mobungkag sa ilang mga stalls.

Si Rupinta nagkanayon nga duna pay ubang mga gipapahawa nga sobra ra kaayong nakatulisok sa mga polis nga diha sa lugar aron sigurohon ang malinawong demolisyon.

Bisan si Rupinta nasabligan og hugaw sa tawo nga gilabay sa mga tawo ngadto sa kapolisan ug sa demolition team.

Ang mga nasikop mireklamo nga gikulata sila sa kapolisan atol sa maong operasyon.

Mipakita si Batoto sa iyang ngabil nga mibuto samtang si Abellaneda mipakita sa iyang bun-og sa lawas, samtang mipasangil si Deligero nga giwitkan siya og sumbag sa usa sa mga sakop sa Special Weapons and Tactics (SWAT).

Si Lacaron mireklamo nga igo ra siyang nagbadlong sa mga babaye nga dili moapil sa lamok-lamok apan giapil siya og sikop sa kapolisan.

Si Capuno ug si Batoto mag-atubang og kasong Resistance and Disobedience to persons in Authority.  Samtang si Lacaron, Abellaneda, Deligero ug ang duha ka Jumag, mag-atubang og kasong Direct Assault. (/EIM)(BANAT NEWS)