CEBU, Philippines - Mipasalig ang kapolisan nga pamenosan ang street crimes sa Sugbo og katunga tungod sa umaabot nga Asia Pacific Economic Conference sa 2015.
Ang hepe sa Police Regional Office 7 Chief Supt. Danilo Constantino miingon nga karong tuiga nila sugdan ang paghipos sa mga badlungon. Gawas pa modemanda siya sa mga sakop nga patas-an pa ang ilang performance sa pagsulbad sa krimen ug crime clearance efficiency niining tuiga.
Si Constantino nakigtagbo na sa hepe sa Security Committee sa APEC nga si Defense Undersecretary Natalio Ecarma ug gihan-ay na ang pasiunang plano.
Dugang ni Constantino nga makompleto ang pagpangandam kun masayran na kun kanus-a ang eksaktong petsa, gidaghanon ug kun si kinsa nga mga lider ang motambong.
Umolon na unya ni Constantino ang mga task groups gikan sa kapolisan sa dakbayan sa Lapu-Lapu, Mandaue ug sa Sugbo aron mobantay sa maong importanteng kalihokan.
Dinhi sa Cebu gihimo ang Association of South East Asian Nation Summit niadtong tuig Enero 2007. (BANAT NEWS)