CEBU, Philippines - Nakabsan sa iyang kinabuhi ang usa ka security guard human kini pusila sa iyang kaubang gwardiya sa usa ka sikat nga hotel sa Sitio Datag, Barangay Maribago, dakbayan sa Lapu-Lapu kagahapon sa kaadlawon. Ang biktima mao si Crisaldo del Alarcon, 37, residente sa sitio Kauswagan, Barangay Bankal, dakbayan sa Lapu-Lapu.
Samtang ang nagpusil ni Alarcon mao si Ericson Alpanta, 32, taga dakbayan sa Davao ug kasamtangan nga nagpuyo sa sitio Agus Gamay, Barangay Agus, dakbayan sa Lapu-Lapu.
Sa pasiunang imbestigasyon ni PO3 John Carlo Jocutan, nasayran nga sa wala pa ang pagpamusil giduol usa ni Alpanta si Alarcon ug silang duha nagkalalis. Diha-diha nadunggan na lang ang nagsunod nga buto sa armas sa ilang nahimutangan ug sa pagsusi sa mga kawani sa hotel nahagba na sa yuta si Alarcon.
Ang mga mirespondeng polis na maoy midala ni Alarcon sa Mactan Doctors Hospital apan namatay gyud ang biktima tungod sa samad pinusilan sa iyang tiyan.
Ang suspek padayon pa karong gipangita sa kapolisan. Nakuha gikan sa crime scene ang lima ka slugs gikan sa wala pa matinong matang sa armas.
Nasuta usab sa kapolisan nga pirme nang maglalis ang duha tungod sa ilang trabaho. - /EIM (BANAT NEWS)