CEBU, Philippines - Gisugdan na kagahapong adlawa sa Land Transportation Franchising and Regulatory Board (LTFRB-7) ug Land Transportation Office (LTO-7) ang kinalit nga inspeksyon sa mga bus ug mini buses nga nagbiyahian sa lalawigan sa Sugbo.
Si LTFRB-7 regional director Ahmed Cuizon maoy nangulo sa nahisgutang kinalit nga inspeksiyon.
Ang maong inspeksyon gipatuman sa mga probinsiya lukop nasud aron pagsuta kun ang mga bus luwas bang sakyan ug nagsubay ba sa road worthiness standard.
Sigon pa ni Cuizon nga una nilang girumbo kagahapon sa buntag sa ilang inspeksiyon mao ang North Bus Terminal diin ubay-ubay sa mga bus ug mini bus nagbiyahian paingon sa Tabogon, Tabuelan ug Bogo ang giatangan ug gipahunong sa paggawas gyud sa bus terminal.
Si Cuizon nagkanayon nga nag-una sa ilang gisusi mao ang mga dokumento sama sa lisensiya sa drayber, prangkisa sa sakyanan, certificate of public conveyance ug ingon man ang mga safety measures requirement sama sa suga, seat belt, busina, wiper ug uban pa.
Gilakip usab nila pagsusi ang chassis ug engine numbers kun pareho ba kini sa gideklarar sa prankisa sa sakyanan aron matino kun wala ba gi-chop-chop ug giilisan og karaan nga pisa ug makina ang bus nga usa sa dakung kalapasan sa balaod. Ang pagsul-ob og uniporme sa mga drayber giistrikto usab.
Usa sa tumong sa maong kalihukan sa LTFRB ug LTO mao ang paglikay sa disgrasya ug mapasalamaton sila sa kooperasyon sa mga drayber ug pasahero. (BANAT NEWS)