Duha ka hepe sa kapolisan girelibohan kay wa magtakdo ilang report sa krimen

CEBU, Philippines - Duha ka police officials sa Central Visayas ang gipailawom sa pre-charged evaluation human 30 porsiyento sa ilang crime reports ang wala mapahibalo ngadto sa Camp Crame.

Kini human si Chief Supt. Augusto Marquez, executive officer sa Directorate for Investigation and Detective Management, mitan-aw nga dunay “discrepancies” nga nadiskubrehan sa iyang pagbisita sa PRO-7 karong semanaha.

Sila si Insp. Rodrigo Tubog sa Sibulan, Negros Oriental, ug Sr. Insp. Merceda-Ruis Balabat, sa Jagna, Bohol, girelibohan sa ilang pwesto  alang sa summary hearing proceedings sa PRO-7. Si Marquez uban ang iyang staffs mihimo og validation sa mga police blotters sa tagsa-tagsa ka mga police offices tungod sa mando ni Secretary Mar Roxas sa Department of Interior and Local Government (DILG) aron pagtan-aw kung nagmatinud-anon ba ang kapulisan sa ilang police records.

Sa 151 ka police stations sa Central Visayas, duha ka hepe ang nadiskubrehang wala magtakdo ang ilang crime volume report sa ilang nasuwat sa police blotters.

“It may not be intentional but that is negligence,” matud pa ni Marquez.

Iyang gibutyag usab nga posibleng mogamit na unya sila sa Crime Incident Recording System, usa ka computerized nga paagi sa pag-blotter sa mga insidente aron sa mas daling proseso. (BANAT NEWS)