Dakit sa M. Velez giputol na
CEBU, Philippines - Giputol na ang dakung punoan sa kahoy’ng dakit nga diha kaniadto magbarog daplin sa karsada M. Velez sulod sa taud-taud nga katuigan.
Ang pagputol sa kahoy’ng dakit, nga matud pa gipuy-an og dili ingon kanato, nagpasabot nga mihinay-hinay na paglihok ang road widening project sa mao nga karsada.
Ang Department of Public Works and Highways (DPWH)-Manila mipagahin og dako nga kantidad aron palapdan ang karsada nga nahimutang unahan og gamay sa Cebu Provincial Capitol building.
Gusto unta sa DPWH nga mahuman ang proyekto kaniadto pa’ng 2011, apan nalangan ang road widening project kay ang mga nagpuyo daplin sa karsada wala gayud mamahawa.
Kun makompleto na ang road widening project gituohan nga makasulbad kini sa problema sa trapiko diha sa mao nga dapit. Mga drayber og PUJ nga nagbiyahean sa Guadalupe dugay ra nga nangindahay nga mahuman na ang pagpalapad sa karsada.
Gipanglantawan hinoon nga kun mapalapdan na ang karsada kilid nga bahin sa Kapitolyo hayan nga putlon ang mao nga mga kahoy nga anaa sa daplin nga mahimutang na unya sa tunga-tunga sa karsada. (BANAT NEWS)
- Latest
